Meh maan...!

Phil Dumoulin woort in 1947 in Mestreech gebore. Nao z’n indexame hbs aon ’t Henric van Veldeke-College ging heer nao de kweeksjaol en woort toen oonderwijzer. In z’ne “vrijen tied” haolde heer de aktes MO-A/B Nederlands  en studeerde daonao Nederlandse Taolkune in Nimwege. In totaal stoont heer 41 jaor veur de klas, de lètste 34 jaor es docent Nederlands en Geschiedenis aon de Hogeschool Zuyd, faculteit Oonderwies.

Al in z’ne studententied waor heer cabbarètesk actief. Heer sjreef, vertaolde en bewèrkde kemedies, musicals en operèttes en heer späölde kemedie bij ’t Mestreechs Volkstejater. In 2000 stoont heer aon de weeg vaan ’t Veldeke Vastelaovends-Cabbarèt. Jaorelaank waor heer actief in ’t Reuzegilde en bij de Veldeke-Kring Mestreech. Same mèt Pol Brounts z.g. lag heer de spelling vaan ’t Mestreechs vas in ’t book “Speulentere spelle”. Heer sjreef wijer beuk euver zie vak, de Mestreechter taol en euver populair-historische oonderwerpe. Ouch vertaolde heer kinderbeuk, o.a. “Keubeke Kuusj” (vaan Peter Brouwers) en “Merie” (vaan Jean-Philippe Rieu). Phil wèrkde mèt aon de cd’s “Inkel Mestreech(s)” (2004) en “E rundsje Mestreech(s)” (2009). Bij zien aofsjeid es Kring-veurzitter in 2006 kraog heer de stadsmedaaje “d’n Trichter” oetgereik.